Elelwani Tour

“Elelwani Tour” ye ya thoma fhala Doroboni ya Tshwane nga mugivhela wa dzi 4 Fulwi 2015 yo vha ya mathakhenisa. Naho phepho yo vha yo dinea maanda, vhathu vho swika nga vhunzhi u tikedza fulo ili la muimbi mukoni wa Gospel Thili Maumela. Vhadivhalea na vhanwe vhaimbi vha muzika wa Gospel a vha ngo shavha na phepho musi vho dadza holo ya Doxa Deo  ine ya vha doroboni ya Tshwane. Lufuno Dagada, Muvhuso Masakona, Solvin “Tshidumbumukwe” Ndou, Thabelo Thavhanyedza, Maumela Mahuwa, Thina Nemukula, Ambani Ramaru na vhanwe vhanzhi vho vha vho swika u kunguwedza mushumo uyu.

Thili, ane a tou vha ndele kha zwiambaro o vha o nakelela lunwe, zwe zwa tou ntsumbedza uri ndi munna wa ndele vhukuma, zwine zwi ya pfala na kha muzika wawe une wo dzudzanyiwa lwa vhudele. Vho vula mushumo nga luimbo thangeli lwa album ine vha khou I itela bembela ili ine ya pfi Elelwani, vha tevhela nga luimbo lune lu khou ita bvumo shango lothe, ‘Mulisa wanga’. Musi vha tshi lu thoma luimbo ulwu, ndo wana ho vuwa zhalinga, munwe na munwe a tshi vhonala uri u khou diphina nga muzika uyu wa mathakheni. Lu tshi sala lu tshi fhela munwe na munwe o vha a tshi pfala a khou imba na Thili uri “ u ya nndededza Yehova”.

Vhusiku ho vha ha vhudisa ha u renda, u khoda na u renda Mudzimu zwine vhanzhi vho tuwa vho fhatutshedzea. Vhathu vho fushwa nga nyimbo nnzhi nahone dzo lidziwaho zwavhudisa nga band ine I ya vhonala uri yo vha yo dilugisela u fusha lushaka. Ho swika na tshifhinga tshe mutanuni wa vhafuwi kha Muvhango Vho-Maumela Mahuwa na muimbi Tshidumbumukwe Ndou vha vho tou gonya kha vhugalatenga vha tshina malende, zwi zwa nthesa.

Ri livhuwisa Thili kha u thuba tshiphuga tsha Best Traditional Gospel kha pfufho dza Mzansi Gospel Music dza 2015.